IkanKelah.com

Tuesday, February 2, 2010

Kati nginang empurau neh?



Baka sempama Cina "Anang meri urang nya ikan. Tang ajar ya cara nginti tauka nangkap tauka nginang ikan ngambi ka ya enda lapar belama-lama". Reti jako tu amat bisa bala kaban. Enti kitai nadai penemu, sukati urang meh enggau kitai. Tang enti kitai bisi penemu tauka bisi kepakaran ngadu ka pengawa,kitai enda iboh agi baka disemak ka sempama Melayu "Kais pagi makai pagi, kais lemai makai lemai." Reti jako to bala kaban, enti kitai bisi penatai pemisi kitai empu, nadai agi kitai suntuk tauka serantak laban utai ti dekereja kitai nya ulih meri asil ngagai kitai ninting bulan tauka ninting taun.

Dalam keluaran tu, aku deka bekunsi enggau kita cara-cara nginang empurau. Aku semina ulih bekunsi enggau kita penemu, tang terpulang ngagai kita sama ada kita deka ngerja ya ke adai. Dalam pengidup tu, enti kitai enda ngubah penatai pemisi kitai empu, alu bakanya belama lah kitai, seruran suntuk.

Mauh kitai kelalu beguai ka nginang keli laban ya ka jampat agi meri hasil. Nadai salah kitai nginang keli, tang enti kitai berati ka konsep dagang, makin mauh urang nyual utai ti sama, makin murah rega barang nya.

Aku sebedau tu mauh udah di asuh bala kaban nginang keli. Tang aku enggai laban nginang keli nadai sik meri cabaran ngagai aku. Aku ka nginang ikan ti ulih meri aku penemu baru, pengalaman baru ngambi ka bisi dikunsi enggau bala kitai.

Aku sebedau tu selalu ngiga maklumat tentang nginang empurau ba internet. Website ti selalu di abas aku ianyan www.ikankelah.com laban sida Melayu ari Kelantan sigi udah lama nginang ikan empurau tu. Sida ya tu udah tau digelar jutawan. Nama kabuah pia, laban sekali sida nyual anak ikan empurau tu, sida ya bulih dalam RM14,000.

Aku selalu ga berandau enggau sida Jabatan Pertanian Tarat baka Encik David enggau Puan Lucy tentang cara-cara minta ikan empurau.

Enti kita bisi ati ka nginang empurau, kita mesti bisi disiplin ti tinggi, ati ti sabar enggau ngembuan pengeliat ati laban ikan empurau tu semina ulih dijual enti ya udah manggai umur 2 ke 3 taun nitih ke pengiruh kita nyaga pemakai ya. Enti kita jenis urang ti enggai kiruh, jampat ringat, jampat putus asa, anang nguji nginang empurau engggai ka kita rugi ngapa.

Enti kita ka meli anak ikan empurau tu ba Kuching, bisi siti kedai ikan ba MJC, ba sepiak hongkong street restaurant. Tauke nya bisi nyual ikan empurau tauka kelah ari semenanjung. Rega ikan nya enda lebih ari 8 ringgit siko. Tang enti kitak meli mauh, ya ulih ga meri rega ti baruh agi. Nya terpulang ngagai kita meh berunding enggau tauke nya.

Enti kita ka minta anak ikan empurau ari Jabatan Pertanian Tarat, kita tau nulis surat ngagai alamat ti diberi aku ba baruh tu.

Pengarah,
Tingkat 17, Menara Pelita,
Jalan Tun Abdul Rahman Yaakob,
Petra Jaya, 93050 Kuching,
Sarawak

Tel: 082-441000, Fax: 082-447821
Website: www.doa.sarawak.gov.my




BAHAGIAN PERIKANAN DARAT/
Inland Fisheries Division
JAWATAN /
Ketua Bahagian /
Head of Division
Pem.Ketua Pen.Pengarah/
Ag.Senior Asst Director Joseph Wei 082-441544 josepwhk@
sarawaknet.gov.my


Udah kita nulis surat tu, sida deka malas surat kita dalam tempoh 2 ngagai tiga minggu. Enti sida ya setuju ka meri nuan anak ikan empurau tu, sida ya deka ngasuh Bahagian Perikanan Darat Bahagian Kuching ngabas kolam kita. Sida ari bahagian Kuching tu deka meda pemesai enggau pemersi kolam kita enggau sistem pam ai ti bisi digaga kita ba kolam kita nya.

Udahnya, sida ari bahagian Kuching tu deka ngasuh kita ngambi surat ari sidaya ba bangunan sida ya ba pasar tamu Satok, ba dampih Singapore Chicken Rice. Dalam suratnya madah ka penyampau ikan ti ulih deberi sida ya ngagai nuan. Udahnya, nuan alu diasoh mai suratnya ngagai Jabatan Pertanian Tarat, Serian. Ba dia, nuan alu ngiga pegawai ba dia alu nunjuk ka suratnya. Tang sebedau nuan mai suratnya ngagai Jabatan Pertanian Tarat, nuan mesti nelepon sida ya dulu ngambi ka sida ya ulih nyedia ka stok ikan ti udah di agih ka nuan. Paling manah kita minta anak ikan tu bulan 8 laban enti kitak minta tumu, sida ya enda ulih meri laban anak ikannnya agi kelalu mit., Enti pemesai ikannya udah manggai seinci, baru sida ya meri ngagai nuan. Tang taja pia, surat ti pertama ngagai Jabatan Pertanian Darat ba Menara Pelita mesti dianjung tumu. Enti ulih bulan 2 ngambi ka sida ya ulih ngator peminta nuan tumu agi.

Diatu aku ka bejako pasal kolam. Sebedau kita nulis surat ngagai Jabatan Pertanian ba Menara Pelita, kita mesti nyedia ka kolam dulu. Kolam tubisi tiga jenis, ianya kolam tanah, kolam konkrit enggau kolam kanvas ti selalu dikena urang nginang keli.

Ari pengalaman aku empu, enti kita ka nginang empurau ba belakang rumah, paling manah kitak ngena konkrit. Kita tauk ngaga diri empu tauka ka ngasuh urang bukai enti kita sigi nadai bisi pengalaman. Kolam konkrit kitanya enti ulih peninggi ya 3 tauka empat kaki laban enti ai ya dalam, ai ya makin celap. Udah kolam kita nya tembu, kita mesti masang tile ba lantai enggau dinding kolam nya ngambi ka ai kolam nya celap. Enti kita ka manah agi, kita tau ga ngisi kolam nya enggau batu karangan. Makin celap ai kolam kita, makin sihat meh ikan empurau kita nya. Enti kolam kita nya udah tembu, kolam nya mesti ditudung nmgambi ka ai ya celap belama. Anang ngasoh kolam nya nunga matahari enggai ka ai ya angat enggau enggai ka mauh bakteria ti ulih munuh ikan empurau kita. Baka kitai mensia meh ya. Enti rumah kitai nadai beratap, pama mai ngetat ke pengangat ari. Enda pia?

Perkara ti kedua, kita mesti meli pam ai laban ikan empurau tu enda ulih idup enti ai ya enda bejalai. Pam ti dibeli kita mesti jenis ti kuat. Rega ya dalam 120 ngagai 180 ringgit nitih ka pemesai kolam kita. Enti ai ya enda bejalai kuat, ikan empurau tu enggai besai, enggai entu makai enggau lemah. Enti kita nadai duit meli pam, kita tau ga ngena sistem graviti enti kita ngaga kolam ba kampung. Maksud aku, kita tau ngaga kolam dampih ai sungai ti mengalir. Ai sungai ti mengalir tu alu di alir kita ngagai kolam kita secara semulajadi tauk secara graviti. Sema jako baka kitai ti ngaga ai irup ari bukit meh kaban.

Pekara ti ketiga, enti nyema kita udah bisi kolam enggau pam ai ti cukup kuat, pekara ti dijaga kita enti nyema kita udah bulih anak ikan empurau, pemersi ai ya mesti dijaga. Kita mesti kiruh ka pemersi ai ya laban enti ai ya kelalu kamah, ikan tu jampat kena penyakit ketegal ai ti kelalu kamah. Anang entu irau kita pasal ai tu laban ikan empurau enda ngamah ka ai baka keli.

Perkara ti pengabis, ikan empurau tu semina ulih dituai enti nyema ya udah manggai tiga taun. Jadi, sementara nganti ikan tu besai, aku minta kita nginang keli, tilapia enggau sultan ngambi ka bisi dijual tauka di pakai diri empu. Aku ngarap ka kitai sam berati ka penemu kena ngemanah ke penatai pemisi kitai.

Aku arap ka kita ulih ngadu tu kadiri empu ngambi ka kita nemu kati nginang empurau. Enti nyema kita ngarap ka urang bukai ngadu ka kita, alu enda belajar meh kita ngidup kadiri empu. Utai ti paling penting, penemu kena ngidup kadiri empu. Aku nulis perkara tu laban aku ka meda kitai sama belajar ngemansang kadiri empu laban kemaia ari tu, kitai enda patut agi idup baka kais pagi makai pagi, kais lemai makai lemai. Kitai patut ngiga penemu ti ulih nulong kitai keluar ari pemerinsa. Nya aja ari aku. Aku munta ampun enti nyema bisi salah jako. Enti sema bisi kurang, tau tambah. Enti nyema bisi salah, tau ga nulong madah ngambi ka kitai sama mansang. Selamat berjaya!!